Сәкен мен Кривогуз көшелерінің қиылысындағы ақын есімін иеленген скверде Қасым Аманжоловтың ескерткіші ашылды. Ақын ескерткіші облыс әкімдігі мен «Қазақмыс» корпорациясы арасында жасалған өзара ынтымақтастық меморандумы аясында тұрғызылды. Жобаның құны 25,5 млн. теңге, авторы Ленин комсомолы сыйлығының лауреаты Жеңіс Молдабаев. Ескерткіштің тұғырымен қоса алғандағы биіктігі - 7,8 метр, өз биіктігі - 3,8 метр. Қоладан құйылған ескерткіш моделі Қазақстан Суретшілер одағының Қарағанды облыстық бөлімшесінің өндірістік комбинатында әзірленді.

"Сен неткен бақытты едің, келер ұрпақ..." атты Аманжолов оқуларының тұсауын бәріміздің жүрегімізді жырмен толқытып, сырға бөлеп жүрген от ауызды, орақ тілді, Арқаның ақыны С.Ақсұңқарұлы ашып, қазақтың қабырғалы шайырлары, ақын Н.Айтұлы, С. Иманасов, қарағандылық қарт ақын Б.Аманжолов, Қ.Аманжолов атындағы II облыстық жыр мүшайрасының бас жүлдегері, журналист, ақын Ж.Жаңқашұлы, Б.Мүбәрәкұлы жалынды жырлармен жалғастырды.

Қасымның ғасырлық тойы Қарқаралыда.
Тойға қатысқан қадірлі меймандар: белгілі коғам қайраткерлері - республика Парламентінің мүшелері О. Әбдікәрімов, Қ. Сұлтанов, т.б. депутаттар мен С. Қирабаев, С. Қасқабасов тәрізді ғалымдар, "Түріксой" халықаралық ұйымының президенті Д. Қасеинов, ақынның қыздары Жанна мен Дариға, туыстары, ақын-жазушылар және шет елден келген қонақтар.

Көпшілік алдында Мәдениет министрі Мұхтар Құл-Мұхаммед Елбасы Нұрсұлтан Әбішұлы Назарбаевтың ақын мерейтойымен құттықтау хатын оқып берді. Қазақстан Жазушылар одағы басқармасы төрағасының бірінші орынбасары Ғалым Жайлыбай баяндамасы ынтамен тыңдалды.

200-ге тарта киіз үй тігілген ақ отаулар қалашығы төріндегі сахнадан Қ.Аманжолов әндері шырқалып, театрландырылған көріністер жиналғандар назарын аударды.

Қызылкент өңірінде ат жарысы және қазақша көрес ұйымдастырылды.